روژناما ئیتلاعات یا ئیرانێ پشتی ب داوی هاتنا کونفرانسا (هەمیاری) ل ناڤبەرا هێزێت سیاسیێت عێراقی و کوردستانی ل تەهران پایتەختێ ئیرانێ ل سالا 1987 ێ، کو شەهیدێ هەردەم ل یاد رولەکێ ئێکجار مەزن گێڕای ل ئاشتبوینەڤە و یەکگرتنەڤا هێزێت سیاسیێت قادا خەباتا دژی دیکتاتورێ عێراقێ، هەڤدیتنەک دگەلدا ساز کر. ئەڤ رولەش بوی هەتا ئەڤر و بویە بناغە و هێمایێ گورانکاری ل سیستەمێ سیاسی عێراقێ بگشتی و دەستکەفتی و دەستهاتێت نەتەوایەتیێت گەلێ کورد ل کوردستانا باشور.
بفەر دزانین ب ڤێ هەلکەفتێ دویماهین هەلوێست و بیر و بۆچونێت ڤی سەرکردێ لێهاتی، دلسوز، دوربین و زانا وەکی خو بو خوینەرێت هێژا وەرگێڕینە سەر زمانێ کوردی دابزانین کا چەوا ئەڤرو یامە دناڤ هەلوێست و هزر و بیرێت سەرکردێ مەزن شەهید ئیدریس بارزانیدا رەنگ ڤەدایە و بویە پروگرامەک نەگوڕ پێخەم پیشڤەچونێ ب سەرکێشیا سەروکێ هێژا جەنابێ مەسعود بارزانی .
ئیتلاعات / رەوشا نها یا خەباتا هێزێت جورا و جورێت عێراقێ دژی سەدامی چەوا هەلدسەنگینی و ژ بو باش بوین و پێشڤەچونا چەندایەتی و چەوانیا ڤێ خەباتێ هنگو چ ڕێگە چارە هەنە؟
ئیدریس بارزانی : ژبو نەهێلانا ڤی زوردارەی و هەڤروی بوین دگەل رژێما سەدامی بژلی خەباتا چەکداری ئەم چ تشتێت دیتر ل پێش خو نابینین. ڕەوشا خەباتا هەرێما کوردستانێ ب ئەگەرا بەرهەڤیا دەڤەرێ و خوڕاگریا بەردەواما خەلکێ کورد زورا باشە، هێزێت خەباتکارێت کورد ل باکور و باکورێ روژهەلاتا کوردستانێ هەر روژ چالاکیان ئەنجام ددەن ئەڤ دەڤەرە بزوری رژێما عیراقێ دەسەلات بسەردا نەمایە و تارادەیەکێ ل کۆنترولا سوپایێ عێراقێ ڕزگار بویە.
چاڤەرێ دکەین ل خەباتکارێت ناڤەراست و باشورێ عێراقێ پتر چالاکیێت خو خۆرت بکەن و زێدەتر ژبو ئازادیا گەلێ بەلەنگازێ ڤی وەلاتی بخەبتن.
ئیتلاعات/ بو داهاتیا عێراقێ هنگ چ بەرنامەکێ پێشنیار دەکەن؟
ئیدریس بارزانی: بۆ داهاتی بیر و بۆچوون دجیاوازن لێ باوەریا مە ئەوە کو هەمی شیان بهێنە بکاربرن هەتا کو رژێما دیکتاتور بهێتە هەڕفین دڤێ گاڤێدا بژلی ڤێ نابیت دهزرا چ بیروکێت دیکەدابین.
ژبەر کو دپلا ئێکێدا پێدڤیە ڤێ ئاستەنگا نەگبەتی لسەر رێکا ملەتی لادەین و پشتی هەڕفاندنا رژێمێ بریار بهێتەدان کو چ بکەین.
ئیتلاعات/ لوارێ جێڤەگر (ئەلتەرناتیڤ) پشتی سەدامی هنگو بیر لێکریەڤە؟
ئیدریس بارزانی: پشتی هەڕفینا رژێمێ پێویستە راپرسیەکا تەڤاڤ ئازاد و دادپەروەرانە بهێتە ئەنجامدان و مافێ هەلبژاردنا جورێ حکومەتێ و دەولەتێ بو گەلێ عێراقێ بمینیت.
ئیدریس بارزانی: ئەم سەدێ سەد دگەل رەئیا خەلکیداینە و مە دەسەلاتداری(حکمیەت) بو خەلکی دڤێت، ئەم باوەرین کو خەلکێ هوشیارە و پێدڤیە دکەشەکێ ئازاد و سەربەستدا چارەنڤیسێ خو بدەستێ خو دیار بکەن.
ئەگەر بزانین کو راپرسی برەنگەک ئازاد و دادپەروەرانە هاتیە ئەنجامدان، روانگە و داخوازیێت خەلکی دێ پەژرینین تەنانەت ئەگەر بەروڤاژی رەئیا مەژی بیت.
ئیتلاعات/ بوچوونا هنگو ل ڕاستا گروپ و خەباتکارێت دیکەیێت دژی سەدامی چیە ؟
ئیدریس بارزانی : ئەم هەمیا ب هەڤال و برایێت خو و پشتەڤانێت خەلکی دزانین و هەمی جهێ قەدر و رێزگرتنێنە، هەر یەک ژ وان لگوری شیانێت خو بزاڤ کریە، پێدڤیە دووبارە هاریکارێت خەباتا مافخوازیا گەلێ عیراقێ بن، تاکو گەیشتن ب مافێت رەوایێت کو خەلک خەباتێ بو دکەت و هاریکاریا هەمی لایەنا پێخەمەتی ئازادیا گەلێ عێراقێ جهێ سوپاس و پێزانینایە و هیڤیدارم خەباتا وان هەمیا بو چێکرنا رێکا مللەتی بیت .
ئێدریس بارزانی : ئەڤ کونفرانسە خو بخو مە ل یەکگرتنێ نیزیک دکەتەڤە ئەڤەش بو مە زورا بەهادارە .
ئیتلاعات/ هنگ چاڤەرێ چ تشتەکێ ل هێزێت دیکەیێت عێراقێ دکەن ؟
ئێدریس بارزانی: ئەم دڤێت هەمی هێزێت خەباتکار ل دەورێ ئێک میحوەرێ خەباتا دژی رژێما بەعس کار بکەین و داخوازێ ل هەمیا بکەین بو بدەستڤە ئینانا ئازادیێ و مافێ رەوایێ مێللەتێ عێراقێ هاریکار بن و خو ل تاکرەویێ و ناکوکیێ بپارێزن ژ بەر کو ئەگەر ئەڤ هێزە هاریکاریا هەڤدوو نەکەن کەسێ دیکە هاریکاریا وان ناکەت .
مە بو عێراقێ پێکهاتن و ئیتیلاف دڤێت، ئەم خوازیارێ ئازادیێنە و پێویستە مە ئەڤ ئازادیە بو هەمی مروڤان بڤێت، هەلبەت دچارچوڤێ کو یاسا دیاری دکەت ئەو یاسایا کو ل رێکا نوێنەرێت راستەقینەیێت خەلکی دهێتە پەسەند کرن .
ئەڤ دیمانەیە ل رۆژناما ئیتلاعات پشتی دوو روژان ل کوچبار بوینا ئیدریسێ جوانە مەرگ ل رێکەفتا 2/2/1987 ل هژمارا 18096 هاتیە بەلاڤ کرن، ل دوماهیا ڤێ دیمانێدا روژناما ئیتلاعات پشتی سەرەخوشیێ ل جەنابێ سەروک بارزانی و میللەتێ کورد دبێژیت : “” کوچبار بوینا ئیدریس بارزانی پێلەکا مەزن ل خەم و کوڤانا گەلێ کورد ل عێراقێ و ئیرانێ چێکر و بێگومان پارتی دیموکراتی کوردستان پشتی کاک ئیدریس بارزانی دێ بەردەوامیێ دەتە خەباتا خو دژی رژێما دیکتاتورا بەعس و رێو رێبازێت ئیدریس بارزانی دێ د بەردەوام بن”".
ئەم خوازیارێ ئازادیێینە و پێویستە مە ئەڤ ئازادیە بو هەمی مروڤان بڤێت
